قناة علوم عظيمة على اليوتيوب

علم الإقتصاد

مقال بالدارجة المغربية: العمل عبر الانترنيت، والكسب والربح من شبكة الانترنيت

لاحظت هنا بزاف ديال الشباب مؤخرا كايطرحو بعض المشاكل اللي اغلبها متعلق بغياب الاكتفاء المادي الذاتي

بعبارة اخرى، كايعانو من الشوماج، واللي خدام ماكافياهش الاجرة ديالو

من بعد التذكير بأن القضية كلها ارزاق، لابد من التنبيه الى ان هناك ايضا موضوع الاسباب.. وهما ماكايتعارضوش، باختصار حيت ماتقدرش تعرف حد الرزق ديالك حتى تدير اللي فجهدك.

ارا لينا دابا لكيفاش نحلو هاد  المشكلة.. اي قضية العمل وايجاد سبل بديلة للرزق.

مقال بالدارجة المغربية: العمل عبر الانترنيت، والكسب والربح من شبكة الانترنيت طرق-الربح-من-الإنترنت.png (118 KB)

 

فهاد المنشور، غادي نشرح اساليب للعمل عبر الانترنيت، او باستخدام الانترنيت لتطوير الاعمال التجارية او الخدمية ديالنا.. وغادي نحاول ندرج ما أمكن باش نوصل الفكرة، وماغاديش نهضر غير فالمجالات اللي اشتغلت ولازلت اشتغل فيها شخصيا ورجعات عليا بنفع كبير ولله الحمد.

لذلك يمكن تعتبرها خلاصات من تجربة شخصية ممكن تفيدك باش تحط رجليك فالطريق الصحيح.

فالحقيقة ممكن تبدا بدون رأس مال.. ولكن كيف كاتعرفو، الفلوس كاتجيب الفلوس -من الزاوية الايجابية طبعا-.

والمقابل اللي غاتعطوني هو دعوة صالحة ف ي ظهر الغيب، ولكم مثلها وزيادة.

نتوكلو عالله...

هنا عارفين بللي بزاف دالناس هنا كايدوزو ما بين 5 و 10 دالسوايع ما بين الفيسبوك وتويتر وانستاغرام والواتساب..الخ. كل واحد فين كايكثر الجلسة، ولكن اغلب الاستخدام كايكون لاجل التواصل الاجتماعي والدردشة..الخ.

واللي ماعارفينوش بزاف دالناس ان هاد المدة كاااافية واكثر باش تخدم ونتا مسركل فالانترنيت.. اه ونتا كاتصفح فالمواقع وكاتجرب فالتطبيقات، ممكن تجني اموال كاتبدا من دريهمات وكاتوصل لمبالغ جد مهمة.

أرا لينا نقسمو المجالات اللي غانهضر عليهم هنا باش نكونو واضحين من الاول:

-التجارة الالكترونية.

-العمل الحر.

-الشبكات الاعلانية.

 

بالنسبة للمجال الاول.. التجارة الالكترونية.

الموضوع بسيط باش تبدا رقميا.. خاصك غير تكون واجد فيزيائيا وعندك القدرة تتحرك فالحياة الواقعية.

المجال الثاني.. العمل الحر.. الفريلانس.

هذا راس مال هو المهارات والامور اللي تقدر تقوم بيها، لا اقل ولا اكثر.. ما تحتاج لا درهم لا زوج باش تبدا.

اما المجال الثالث.. الشبكات الاعلانية.

هادي تحتاج شوية دالمهارات التقنية البسيطة فالتعامل مع بعض المواقع او المنصات المعروفة.. بحال منصات التدوين -بلوجر، ووردبريس...- ومنصات نشر الفيديوهات -بحال يوتيوب مثلا-... وطبعا المواقع الاجتماعية الاساسية مثل فيسبوك.. وهادو كاااملين كانتوقع كلكم او اغلبيتكم عالاقل ماغايلقاش مشكلة فالتعامل معها، بل كايتعامل معها مسبقا.

 

ارا لينا للتفاصيل دابا.

بالنسبة للمجال الاول، باش تبدا التجارة الرقمية خاصك تصاوب متجر الكتروني، وفحالة المبتدئين والمتاجر الصغيرة، راه يمكن يتقام عليه المتجر بصفر درهم حتا ل 500 درهم فاقصى حد... صبر غاتعرف شنو كانقصد فالتفاصيل التالية:

مثلا، عندك نظام ووردبريس الشهير، بسيط وسهل الاستخدام وتدعمه الاف الاضافات القوية جدا، ابرزها فاطار التجارة الالكترونية نجد: ووكمرس woocommerce

والاستضافة ديال هاد المتجر غاتكلفك ما بين النطاق والمساحة وقاعدة البيانات والبريد الاحترافي، ما بين 300 و 600 درهم فالعموم.. حسب كل شركة استضافة.

اما كيفية انشاء المتجر باستخدام الووردبريس، راه كاينة دورات كثيرة وعديدة.. منها دورة بديتها مؤخرا فيها شروحا لمجالات العمل عبر الانترنيت الثلاثة اللي ذكرتها لفوق، واللي بديتها بشرح لكيفية انشاء وتطوير متجر إلكتروني احترافي بدون اي معرفة تقنية متقدمة من قبيل البرمجة او التصميم او غيرها.. بحيث يمكن لينا ب تصميمات عالية الجودة سواء المجانية منها او المدفوعة --كل واحد وجهدو-

عندك ايضا نظام بريستاشوب اللي فيه خيارات واسعة واضافات متخصصة فالتجارة الالكترونية بالذات، وكاينة انظمة اخرى اللي يمكن الخيارات فيها اقل ولكن اسهل بكثير وماكان لا استضافة ولا هم يحزنون، وطبعا اغلبها طايتطلب شوية دالفلوس، البعض منها كاتخلص مع البدية والبعض حتى تبدا تدخل الفلوس من المبيعات عاد يتخلصو منك.. كاين مثلا شوبيفاي وكاينة انظمة اخرى عديدة، واحد منها مغربي تحت اسم "يوكان" اللي كايشارك فيه ويمكن كالملكو واحد السيد مغربي معروف باسم "سيمو لايف".

هاد الانظمة وغيرها غانشرحها لاحقا وندير فيديوهات تطبيقية لكيفية التعامل معها خطوة بخطوة. وغايبان ليكم شحال ساهل تصاوب متجر الكتروني واخا تكون ماكاتعرف شي حاجة فالمعلوميات من غير استخدام متصفح كروم او فايرفوكس.

 

ارا نرجعو للمجال الثاني.. العمل الحر.

هنا الخيارات واااااسعة وعديدة جدا، وماغايتطلب منك غير "جهدك" باختصار شديد.

اما كيفاش وفين؟ هذا سؤال اللي غانجاوب عليه بامثلة مباشرة وباختصار شديد --يعني نعطيك رأس الخيط ونتا قلب على راسك-- وفي وقت لاحق غاندير فيديوهات لبعض هاد لامشاريع نشرحها ونوضح طريقة العمل فيها بامثلة تطبيقية..

نبداو مع موقع عربي تحت اسم "مستقل" Mostaql.com

هاد الموقع شخصيا خدمت فيه عدة مشاريع، لحدود اللحظة 6 دالمشاريع كاتبدا من اعمال صغيرة جدا انهيتها في ظرف ساعة او اكثر قليلا بقيمة 100 دولار - 80 هي الارباح النهائية بعد حذف عمولة الموقع-.. والبعض الاخر لمدة ليست بالقصيرة بقيمة 800 دولار -تقريبا 655 دولار قيمة الربح من المشروع-.. وكلن ماشي هنا كاينة الهمزة، انما فالناس اللي تعاملت معاهم، حصلت على تقييم 5/5 نجوم فجميع المشاريع، والحمد لله كلها دازت فوق مزيااانة، والبعض منهم راسلوني للتعامل فمشاريع اخرى خارج الموقع، ولازلت اشتغل مع 3 منهم لحد الان.

يعني الرباح الحقيقي هو العلاقات المهنية اللي غاتربطها مع ناس كايعرفو غير الخدمة، هاك وارا.. خدم تخلص.

وديك الساع ارا ماعندك.

العيب اللي فهاد الموقع هو الاثمنة العادية طايحة شوية بسبب ان اغلب الموجودين فيه بالاضافة للمغاربة طبعا كينين دول اللي الدولار غااالي عندهم بحال مصر وسوريا والعراق.. وهنا كاتلقى ناس كاتطيح فالثمن بواحد الشكل اللي ممكن يبان غير معقول.. ولكن راه عادي حيت 100 دولار عندنا حنا يلاه 900 درهم، ولكن بالنسبة لواحد مصر راها كاتعني 1500 جنيه.. يعني 200 دولار بالنسبة ليه راه غاتبان ليه بحال شي 300 دولار بالنسبة ليك.

ولكن، فالنهاية جودة الخدمة والمصداقية فالعمل هي اللي غاتفصل بينك وبينو.. وكون على يقين بللي راه كاينين ناس اذا خدمت معاهم مزيان ماغايسولوكش عالفلوس، بالعكس ممكن يسول فقنط اخر ويجي يقولليك راه لقيت هاد الخدمة عند واحد اخر غير ب 300 دولار، ولكن جاتك نتا 500 اللي طلبت غير قضي الغرض.

موقع اخر هو upwork وهذا معروووف لكونه موقع قديم وكان تحت اسم اوديسك، والناس القدام فالمجال كايعرفوه بالتأكيد..

ونفس الطريقة دالعمل ديال مستقل ولكن بميزات اكثر، مثلا فيه خاصية ديال الشركات.. يعني هنا نتا ماكاتكونش فمنافسة مع افراد بحالك وانما افراد وشركات.. بالمناسبة موقع مستقل ممنوعة فيه الشركات يخدمو ك "مستقللين" لدرجة انه ممنوع تقول فشي عرض على شي مشروع انكم "فريق" او "شركة".
"أب وورك" مديور للجميع، سوا شركات او افراد، والشركات بطبيعة الحال خاصهم يخلصو شي بركة باش يخدمو ملف الشركة ديالهم.. انا نيت بديت فداك البلان مع واحد الصديق، وخلصنا 200 درهم للشهر، ولكن فالاخير درنا الغاء للعملية حيت بان لينا ماكاين حتى فرق مهم بين الملفين من غير انك كاتبين زعما راكم فريق وتعرض اعضاء الفريق.. وهاد الخاصية الاغلبية ديال اصحاب المشاريع ماكاتهمومش، المهم الخدمة تقاد مزيان واخا تكون "نص بنادم" ماشي غير "فرد" واحد او اثنين.

العيب اللي فيه هو انك خاصك تخلص اذا بغيت ملف جيد ويتم اقتراحه خاصك تدير عضوية مدفوعة.. يعني تخلص، وطبعا خاصك تكون كاتعرف الانجليزية كتابة وتواصلا.. ولو بمستوى متوسط.

كاين موقع اخر جد معروف واللي هو فريلانسر freelancer.com

ونفس الهضرة اللي قلناها لفوق نقدرو نعاودوها عليه، مع الانتباه الى انه كاينشطو فيه الهنود والباكستانيين بزااااف، وهادو ماشي غير مطيحين من الثمن مقارنة بالعرب.. راه بعض المشاريع مستحيل تيق شي اثمنة كايحطوها الهنود عليهم، مشروع ديال سيمانة دالخمة ---ولكن بمعنى الخدمة...-- كاتلقاه محطوط ب ما بين 50 و 250 دولار، وكايجي واحد كايقول بللي غايخدمو ب 51 دولار هههه

ولكن مع ذلك، مانساوش بللي كيف قلنا فالاول اللي مهتم بالجودة دالعمل ماشي غير ماغايتسوقش للفرق فالعروض المالية بين وبين شخص اخر، لا راه كاين اللي اذا شافك درت ليه قيمة اقل بكثير من المعقول او المتوسط، ماغايتاصلش بيك نهائيا وغاتبان ليه بحال شي واحد كايتفلا او شي واحد بغا يتعلم فيه.

وباشما نعاود الهضرة اللي قلت لفوق نزيد واحد الافادة هنا، ركز دائما على زوج دالامور: الجودة والتفاني فالعمل.. والثاني هو: حسن التواصل.

 

هاد المواقع الثلاثة اللي ذكرت لفوق خاصة فقط بتقديم الخدمات، واخا مركزين على الخدمات التقنية، ولكن راه كاينة مجالات اخرى فنية وهندسية عديدة، مثلا كاينة تصنيفات كاتحط فيها مشاريع تصميم وهندسة للبنايات وكذا مشاريع ترجمة للكتب وترجمة للمقالات وغيرها.. يعني كيفما كان المجال ديالك، دخل وقلب فمحرك البحث ديال دوك المواقع راه غالبا غاتلقا شي حاجة محطوطة فالمجال ديالك، دخل ودير المدة اللي كاتقوعها باش تسالي للسيد خدمتو، وبشحال، وتوكل عالله وتسنى الرد.

ارا لينا دابا مواقع اخرى متخصصة فطرق عمل اخرى..

عندك موقع خمسات

 

عندك كذلك موقع أريد ureed.com

هذا موقع كايختص فالترجمة وعمل البحوث وكتابة المقالات التحريرية

 

كاين كذلك واحد الموقع سميتو " أي خدمة" ikhedmah.com

الفكرة ديالو بحال مستقل تقريبا ولكن بطريقة اخرى كاتعلق بربط الشباب ممن يمتلكون مهارات الكترونية  بالعملاء او الشركات

 

فنفس الصدد كاين واحد الموقع سميتو "بعيد" baaeed.com

وهذا فقط للناس اللي بغاو وظيفة عن بعد، ولكن راه واظيفة... يعني غالبا خاصك تكون شوماج او مستعد تخللي خدمتك الحالية باش تخدم فيه، وللامانة كنت جربتو واتصلو بيا 3 دالشركات، وحدا فيهم اللي مصاوبا موقع "مستقل" ومجموعة خدمات اخرى مشابهة.. للاسف كانو بغاو شي حد يخدم موظف بصالير ثابت، وانا ماشي هادشي علاش كانقلب.. واحد اخر خدمت معاه ولكن لإدارة مستقلين فاطار واحد المشروع برمجي، والخلاصة هنا ان انه كاينة الخدمة عن بعد وكاين مايدار.

عندك كذلك واحد الموقع سميتو "خمسات" khamsat.com

الفكرة ديالو انك تدير خدمات صغيرة ومختصرة ب 5 دولارات فقط... اه 5 دولارات فقط، وهادشي علاش سميتو خمسات.

ولكن بلاتي، ماشي هنا كاينة الضربة، ولكن فانك ممكن تدير ميزات ملحقة بقيم اكبر.

نعطيك مثال، ممكن تدير خدمة بعنوان "احصل على ألف معجب لصفحتك فيسبوك ب 5 دولارات"

يمكن تكون عندك شي طريقة باش تدير هاد البلان.. ولكن ماشي هنا كاين الربح، حيت ممكن تدير ميزات اضافية فنفس الخدمة بقيم مضاعفة، مثلا : "احصل على 3000 معجب اضافي ب 50 دولار".. هنا اليل شرا عندك الخدمة الرخيصة ب 5 دولارات ولقاها مزيانة غايزعم يشري عندك الخدمات الاضافية واخا تكون كل وحدة ب 100 دولار.

وضرب الكل فعدد المشترين للخدمة، مثلا 15 واحد فالشهر.. على حسب جهدك وطبيعة العمل ديالك والخدمة اللي كاتديرها.

 

المهم من هادشي، وفهاد المواقع كاااملة دير فبالك بللي ماشي القيمة المباشرة اللي كاتحطها هي اللي غاتجيب ليك الرباح، وانما شنو ممكن يجي من وراها... وهاك هاد القولة: لا تعمل لأجل المال ، بل دع المال يعمل لأجلك !

 

عشرات ومئات المواقع الالكترونية كاتوفر ليك اللي بغيت ونتا فدارك، سوا وظيفة او عمل حر وقتما تحب وبالمبلغ الذي تريد وتحت أطراف أصابعك.. غير عرررري على ذراعك.

 

 

 

البعض غايقول كيفاااش غانديرو لهادشي؟ واش قرايتنا غاتنفعنا؟

بناء على التجربة ديالي، وبالمناسبة راه عندي ماجيستير فهندسة البيانات... هادشي غير باشما يقول شي واحد راه حقا ماقاريش داكشي علاش كاتقول هاكا.. راه كانقول هاد الهضرة بحكم انها خلاصة من واقع تجربة شخصية لسنوات !

الواقع أننا نحن كانحصلو فالمدارس والجامعات -بل وحتى فمراكز التكوين- على تعليم ردئ لا ينفعنا فالمجال المهني الا قليل من الاستثناءات.

عمرك سمعت شي استاذ كايعلمك كيفاش تكسب الفلوس او تجمعها ويوريك ماشي غير يبقا يخرط عليك.. يعني يقوللي مثلا دخل للموقع الفلاني او سير للشركة الفلانية ودير 1 و 2 و3 ...الخ وغاتخلص؟ طبعا الاستثناءات غير معنية هنا.

البعض غايقولليك واش بغيتها باردة؟ لا أ سي محمد راه نتا اللي كاتحاول تبرد على راسك، حيت حتى حد ماقاليك بغاها باردة انما الناس بغات راس الخيط، هاهوما عندهم المواهب والكفاءات، اوا ومن بعد؟ واش غايبقى حياتو كامل خدام عبد عند شي واحد بأجرة هزيلة وكايتسناه يقطر عليه كل شهر؟ راه عطاااا الله مايدير كون وريتو كيفاش يخدم المهارات ديالو بشكل صحيح.

راه من أسس الإقتصاد الصحيح انك تعلم الانسان كيفاش يدخل الفلوس فأي وقت خلال الشهر، ماشي أجرة كل شهر !! هادي ماقالهاش بيل غيتس ولا علي بابا ولا روبرت كايوساكي انما ان اللي قلتها لك وعارف شنو كانقول.

 

باشما نطول اكثر، ارا لينا ندوزو للمجال الثالث، واللي هو العمل عبر الشبكات الاجتماعية.

أكبر مثال ممكن نطرحو هنا هو جوجل أدسنس.. وبالطبع اليوتيوب غايتذكر هنا فهاد الصدد :)

شحال من واحد غايقولليك واش دابا انا غانبقا نكتب فالموقع ديالي او نشر فالفيديوهات دائما؟

قبل مانجاوب، خللينا نعرفو بهاد المجال للناس اللي ماعرافاش.

الفكرة هنا انه كاين معلنين، يعني شركات او افراد عندهم خدمات او منتجات بغاو يديرو ليها اعلانات، وهنا خاصهم شي بلاصة اللي فيها الناس اللي بغاو، واللي غايكونو زبناء او زوار محتملين... ولكن كيفاش غايوصلو ليهم؟

نفتارضو نتا عندك مدونة او موقع او قناة يوتيوب، وجات واحد الشركة من دولة اخرى صيفطات ليك باش تدير اعلان عندك.. هنا كاين احتمال مهم ان واحد فيكم ينصب على لاخر.. وهاد النقطة بالذات اللي استغلاتها الشبكات الاعلانية باش تدير وساطة بين اصحاب المواقع والمعلنين.

هنا مثلا جوجل كاتاخذ الاعلان من عند المعلن، والفلوس طبعا، وتعيطيك نتا الاعلان (فالحقيقة كايعطوك كود تحطو فالموقع ديالك وهو غايعرض الاعلان بشكل اوتوماتيكي وذكي) وفالنهاية وعلى حسب شحال ديال الناس شافو داك الاعلان او دخلو ليه غاتخلص، وطبعا كاتدخل فيها عوامل عديدة منها شحال مخلص المعلن على الاعلان ديالو، وجودة الزيارات ديالك نتا والفئات العمرية ديالهم والمناطق اليل جاو منها...الخ.

المهم، واللي كايهمك نتا هنا، انه ممكن تدير فيها مروج لهاد الاعلان بلاما تعرف الشركة اللي حاطا الاعلان من الاساس.. نتا كاتعرف غير الوسيط، مثلا جوجل، وفقط، هو كايطلع الاعلانات ديالو، ونتا كاتتبع الاحصائيات ديالك، وتاخذ فلوسك فنهاية الشهر (طبعا كايديرو الحد الادنى للدفع.. حيت ماشي معقولة يسالي الشهر ونتا عندك 50 درهم وغايصيفطوها ليك.. راها مامخلصاش حتى تكاليف عملية التحويل.. جوجل ادسنس مثلا دايرين بللي خاصك توصل ل 800 درهم عاد يصيفطوها ليك).

فالحقيقة كاينين امثلة عديدة، ومنها واحد الشبكة عربية سميتها "حسوب" hsoub.com

وغانهضر عليها مستقبلا بالتفصيل كيفاش تسجل ويتم القبول ديالك وكيفاش تحط الاعلانات ديالك..الخ،

ولكن هنا ركزت على جوجل ادسنس لكونه اكبر شبكة من نوعها في العالم والكثيرين منكم كايعرفوها.. راه اعلانات اليوتيوب مثلا هي جزء منها واغلبيتكم غايكون شافها، بل جميعكم، اي واحد دخل لليوتيوب من قبل راه شاف امثلة لدوك الاعلانات فالفيديوهات... هاداك راه جزء من جوجل ادسنس تحت اسم "اعلانات جوجل للفيديوهات" او "ادسنس للفيديوهات".

المهم بغض النظر على اي هضرة غاتكونو سمعتوها على هاد الموضوع، خلليني نقولليكم بللي الربح من المواقع والمدونات كايبقى افضل واكبر بكثير من اليوتيوب.. وخلليني نقولليك مثلا انني شخصيا فالوقت اللي كانكتب هنا عندي عدة مواقع كاتعرف الالاف الزوار بشكل يومي وكاتدخل منها شي بركة اللي واخا ماندخل لشي واحد من دوك المواقع لأسبوع او اكثر فحالة الانشغال.. هنا كانرجعو للمثال اللي قلتو لفوق: خللي الفلوس تخدم عليك.. وبطبيعة الحال اذا فيك اللي يبقى يحط فالفيديوهات بشكل مستمر راه قناة او قنوات يوتيوب حتى هي فيها المعنى.

عموما طريقة انشاء مدونة، او قناة يوتيوب، ثم الاشتراك فجوجل ادسنس ونحو ذلك غانكتبو فمنشور اخر، وغانشرحو بشكل تطبيقي ففيديوهات تعليمية مجانية.

كبداية لدورة فهاد المجال، وبحكم وجود بعض الوقت عندي هاد الايام غانحاول نسجل اكبر عدد من الفيديوهات فهاد الفترة، وفحالة الانشغال غانحط روابط لفيديوهات من قنوات اخرى ممكن تعاون فالاستمرار.. بديت أول درس واللي هو: كيفاش تصاوب متجر باستخدام الووردبريس:

غانحاول نزل بقية الفيديوهات عما قريب واللي كاتشمل جميع الخطوات.. من انشاء المتجر، تركيب ثيمات احترافية، ضبط واعدادات، استضافة، ترويج للمتجر عبر فيسبوك واعلانات جوجل..الخ.. وماغاتحتاج تعرف اي شيء عن البرمجة، كل المراحل غاتكون بسيطة وسهلة الاستخدام من طرف اي شخص غير ملم بالتقنيات الحديثة والتطوير والبرمجة لا من قريب او من بعيد.

ومن بعد غانرجع لشرح مواقع العمل الحر وكذا مجال الشبكات الاعلانية، ونعطي امثلة تطبيقي لكيفاش تتعامل معها.

الى بان ليك هادشي مفيد، شارك مع الاصدقاء باش تعم الفائدة.

 

كان معاكم عبدالناصر البصري


لأي إستفسار أو ملاحظة ضع تعليقا على الفيديو أو أرسل لي رسالة إلى البريد التالي:
contact@elbasri.net
فيسبوك:
https://www.facebook.com/abdennacerelbasri

تويتر:
https://twitter.com/elbasrino

 

شكرا للوقت ديالكم، وبالتوفيق للجميع.

 




السابق
الاسهم الامريكية 24 نوفمبر 2020 داو يرتفع 400 نقطة ويتجاوز 30000 نقطة
التالي
العمل عبر الانترنيت - دورة مخصصة للمتاجر الإلكترونية والعمل الحر والربح من الإعلانات

0 تعليقات

أضف تعليقا

اترك تعليقاً